«Монтеррей» клуби ҳимоячиси Серхио Рамос янги жамоасида нега 93-рақамни танлагани ҳақида гапириб ўтди.

«93-дақиқа – менинг энг яхши лаҳзам эди. Бу рақам «Реал» ва бутун фаолиятимга бўлган ҳурмат тимсоли. Буни сизлар билан – Мексика, «Монтеррей» ва мухлисларимиз билан бўлишиш қандай ажойиб!» – дея келтиради DAZN Рамоснинг сўзларини.

Эслатиб ўтамиз, 2013/14 йилги Чемпионлар Лигаси финалидаги «Атлетико»га қарши ўйинда Серхио Рамос 90+3-дақиқада гол урган ва ҳисобни тенглаштирган. Ушбу гол «Реал»га ўйинни қўшимча бўлимларга ўтказиш имконини берган ва якунда «қироллик клуби» 4:1 ҳисобида ғалаба қозонганди.

Маълумот учун, Серхио Рамос «Монтеррей»га эркин агент сифатида қўшилди. У ёзда «Севиля»ни тарк этганидан буён жамоасиз эди.