«Манчестер Юнайтед» бош мураббийи Рубен Аморим Англия Кубоги 1/16 финали доирасида «Лестер»га қарши 2:1 ҳисобида қозонилган ғалаба ҳақида фикрини билдирди.

«МЮ» 1-бўлимдан кейин мағлубиятга учраётган эди, аммо иккинчи бўлимда ирода кўрсатиб, Ҳарри Магуайрнинг қўшимча дақиқаларда урган голи эвазига ғалабага эришди. Офсайддан урилган гол VAR йўқлиги сабабли бекор қилинмади.

«Биз охиригача ишонишимиз керак эди, аммо бу ўйиннинг Ферги-тайм билан ҳеч қандай боғлиқлиги йўқ. Биз ҳозиргидан буткул яхшироқ ўйнашимиз керак. Тўп билан ҳам, тўпсиз ҳам ҳаракатимиз ва ўйинимиз маромида эмас. 

Биринчи бўлимда бизга шижоат етишмагандек кўринди. Иккинчи бўлимда бироз яхшироқ ўйнадик, тезликни оширдик, тўп учун курашларда устунлик қила бошладик. Шундан сўнг вазиятни ўзгартиришга муваффақ бўлдик. Бу яхши натижа, аммо яхши ўйин эмас.

Агар жамоа яхши ўйнамаса, биринчи навбатда мураббий жавобгар. Бу менинг айбим, аммо биз ўйинни таҳлил қилиш, уни яхшилаш ва навбатдаги баҳсга тайёрланиш учун шу ердамиз», – деди «МЮ» бош мураббийи.