«Реал» бош мураббийи Карло Анчелотти «Атлетико»га қарши ўйиндан аввалги матбуот анжуманида Ла Лига президенти Хавьер Тебаснинг сўзларига жавоб қайтарди.

Аввалроқ, «Реал» «Эспанёл»га (0:1) қарши учрашувдаги ҳакамлик бўйича Испания Қироллик футбол федерациясига (RFEF) расман шикоят қилганди. Унда Испаниянинг ҳакамлик тизимини тўлиқ янгилашни талаб қилиб, ҳакамларни клубга «такрорланувчи зиён етказишда» айблаган эди.

Шундан сўнг, Ла Лига президенти Хавьер Тебас «Реал» ўзидан жабрланувчи ясаб кўрсатишга уринаётгани, бу орқали Мадрид клуби Ла Лигага зиён етказмоқчи эканини айтиб, «Улар ақлдан озган» деди.

Ла Лига раҳбарининг сўзларига жавобан Анчелотти Ла Лигадаги ҳакамлик тизимидан ҳеч ким рози эмаслигини таъкидлади.

«Бу мавзуга «Атлетико»га қарши муҳим ўйин олдидан киришмоқчи эмасман.

Тебас тинчланиб олсин, ҳеч ким ақлдан озгани йўқ. Бизга улар томонидан фақат тушунтириш керак эди. Тизимни ўзгартириш масаласида. Билишимча, ҳеч ким Ла Лигадаги ҳакамлик тизимдан рози эмас.

Улар тизим «Реал»га ёрдам беради деб ҳисоблашади, аммо «Мадрид» буни ўзгартиришни истаса, улар бундан бош тортишмоқда», – деди «Реал» бош мураббийи Карло Анчелотти.