«Ливерпул» бош мураббийи Арне Слот Англия Лига Кубоги яримфиналидан ўрин олган «Тоттенҳэм»га (4:0, биринчи ўйин — 0:1) қарши баҳсдан сўнг ўз фикрлари билан ўртоқлашди. 

«Бизда бунгача ҳам «Энфилд»да бир нечта муҳим оқшомлар бўлганди, аммо финалга чиқиш ўзгача бўлиши керак. Ҳа, бу — энг ўзига хос оқшом.

Нидерландияда бизда фақат битта кубок мусобақаси бор ва финал мавсум охирида ўтказилади. Шунинг учун Лига Кубоги — мен учун янги тажриба, аммо яхши.

«Уэмбли» — Буюк Британия учун ўзгача стадион, балки нидерландияликлар учун ҳам, чунки биз стадион ва финаллар тарихини биламиз. У ерга бориш жуда ёқимли, лекин биламизки, финалда  жуда кучли рақиб кутмоқда. 

Бугунги ўйинга келсак, биринчи бўлимда жуда кўп жароҳатлар бўлди, шунинг учун ўйинни бошқариш қийин эди. Аммо биз жуда яхши ишладик, рақибга эса илк зарбани йўллаш учун 80 дақиқа керак бўлди. Жамоамдан ажойиб ўйин. 

Биз яна кўплаб ўйинлар ўйнашимиз керак. Омадимиз келди, Чемпионлар Лигасидаги 6 та ўйиндан кейин плей-оффга чиқдик, шунинг учун ротациялар қила олдик. 

Англия Премер-лигасида кўп ўйинлар ўтказасиз, аммо фақат 20 ўйинчидан фойдаланишингиз мумкин. Агар ўйинлар жуда кўп бўлса, сизга 20 дан ортиқ футболчи керак. Бизда ҳар доим биринчи жамоанинг 20-22 ўйинчиси ва академиянинг яна бир қанча йигитлари бўлиши керак. Шунда бугунгидек мукаммал ўйин бўлади.

Финалда фақат бир камчилик бор — ўша ҳафта ўртасида «Астон Вилла» билан ўйин бўлади. Аммо муваффақият янада кўпроқ ўйинларни юзага келтиради. Буниси ижобий», — деди нидерландиялик мутахассис Sky Sports эфирида.

Финал 16 март куни бўлиб ўтади ва унда «Ливерпул»га «Нюкасл» рақиблик қилади.