Ла Лига президенти Хавьер Тебас «Реал»нинг ҳакамлар устидан шикоятларига муносабат билдирди.

«Реал» Ла Лига ва турнирга зиён етказмоқчи. Уларнинг ўзларини жабрланувчидек кўрсатиши ҳақиқатга тўғри келмайди.

Улар Негрейра иши бўйича ҳам тўғри муносабатда бўлишмаяпти. Негрейра ишида у ҳакамларнинг мақомига таъсир кўрсатишга урингани ҳақида далиллар бор, аммо ҳакамларга тўланган пуллар ҳали ўз исботини топмаган. Улар эса ўзларидан жабрланувчи ясаб олишмоқда.

Клуб баёнотидан шундай хулосага келиш мумкинки, турнир бошидан охиригача адолатсиз ўтмоқда. Улар ақлдан озган.

Албатта, биз ҳам уларнинг устидан шикоят қиламиз, «Реал» каналига нисбатан ҳам эътирозлар кўп. Судга даъво аризасини киритиш масаласини кўриб чиқамиз. Ҳозирда ушбу масалага юридик жиҳатдан баҳо беряпмиз. Улар турнирга таъсир қилишга уринишмоқда», - дейди Тебас.

Аввалроқ, «Реал» «Эспанёл»га (0:1) қарши учрашувдаги ҳакамлик бўйича Испания Қироллик футбол федерациясига (RFEF) расман шикоят қилганди. Унда Испаниянинг ҳакамлик тизимини тўлиқ янгилашни талаб қилиб, ҳакамларни клубга «такрорланувчи зиён етказишда» айблаган эди.