«Пахтакор» бош мураббийи Педру Морейра Элит ОЧЛ 7-туридан ўрин олган «Ал Ғарафа» (0:1) билан ўйиндан сўнг ўз фикрларини билдирди. 

«Ўйин қийин кечишини билгандик. Чунки рақибимиз яхши савияда ва уларда мавсум давом этмоқда. Биринчи бўлимда рақибга бир неча имконият бердик ва улар бундан фойдаланишди. 

Доим ғалаба учун ўйнаймиз. Ҳозир навбатдаги беллашувни ютиш ҳақида ўйлашимиз керак. Иккинчи бўлимда яхши ўйнадик, темпни назорат қилдик. Мезбонларга олдинга ўтишга имкон бермадик. Фақат вазиятлар яратишда камчиликлар бўлди. Бунинг устида ишлашимиз лозим. Биз энди биринчи расмий учрашувда майдонга тушдик. 

Бизни стадиондан қўллаб турган ишқибозларга раҳмат айтаман. Улар жамоани яхши кўришади ва бунга муносиб жавоб беришга ҳаракат қиламиз», — дея португалиялик мутахассиснинг сўзларини келтиради клуб матбуот хизмати. 

«Пахтакор» 7-турдан сўнг 4 очко билан 10-ўринни эгаллаб турибди ва плей-офф йўлланмасини берадиган топ-8га кириш учун сўнгги турда «Ас Садд»ни мағлуб этиши ҳамда қолган ўйинлар натижаларини кутиши керак.