Элит Чемпионлар лигаси 7-тури доирасида «Пахтакор» 4 феврал куни Қатарда «Ал Ғарафа» меҳмони бўлади. Ушбу ўйиндан олдин матбуот анжуманида Тошкент жамоаси бош мураббийи Педру Морейрага ва ҳужумчи Игор Сергеев иштирок этиб, фикрларини билдирди.

«Биз мазкур учрашувга тайёргарликни яхши ўтказдик деб ўйлайман. Бир ой янги мавсумга ҳозирлик жараёнида бўлдик. Машғулотларда имкон қадар ишладик. Бизни мавсумдаги биринчи расмий ўйин кутиб турибди. Рақиб эса мавсумининг қизғин палласида. Бизни кескин баҳс кутиб турибди. Яхши ўйин намойиш қилиб, ижобий натижага эришишга интиламиз.

Рақибни ўрганиб чиқдик. «Ғарафа» яхши савиядаги футболчиларга эга жамоа. Португалиялик мураббий Педру Мартинс бошчилигида улар ҳужумкор футбол кўрсатишмоқда. Рақибимиз жуда кучли жамоа», - дейди португалиялик мураббий.

Ҳужумчи Игор Сергеев эса ҳозирда жамоадаги муҳит ажойиб эканига урғу берди.

«Туркиядаги йиғинда бир ой машқ қилдик. Ўйлашимча, жисмонан ва руҳан ўйинга тайёрмиз. Жамоадаги муҳит ажойиб ҳолатда. Эртага муҳим беллашув бўлади. Биз майдонда боримизни беришга ҳаракат қиламиз. Уйга ижобий натижа билан қайтишни хоҳлаймиз.

«Ғарафа» яхши шаклланган жамоа, таркибида кўплаб хорижлик ва маҳаллий юқори савияли футболчилар бор. Биз мавсумни энди бошлаймиз. Имкон қадар энг яхши ўйинимизни кўрсатишга уринамиз», - деди Игор Сергеев.

Маълумот учун, «Пахтакор»нинг Доҳадаги ўйини эртага, 4 феврал куни соат 21:00да бошланади. Турнир жадвалида «Пахтакор» 4 очко билан 9-ўринда, «Ал-Ғарафа» эса шунча очко билан 10-ўриндан жой олган. Кучли саккизликдан ўрин олган жамоалар якунда плей-оффга йўлланма олади.