Хави Симонс «Лейпциг» клубидаги фаолиятини давом эттирадиган бўлди.

Инсайдер Фабрицио Романонинг ёзишича, ҳуқуқий жиҳатдан «ПСЖ»га тегишли бўлган ва ҳозирда ижара асосида «Лейпциг»да тўп сураётган 21 ёшли нидерландиялик яримҳимоячи немис клуби томонидан 81 миллион еврога трансфер қилинган. Келишувга кўра, Париж клуби футболчининг кейинги трансферидан ҳам ўз улушига эга бўлади. Симонс лейпцигликлар билан 2027 йилга қадар шартнома имзолаган ва келишув ёзда узайтирилиши мумкин.

Журналист Флориан Плеттенбергнинг ёзишича, немис клуби Симонснинг трансфери учун 50 миллион евро тўлаб, қолган маблағни бонуслар ва бўлиб тўлаш эвазига қоплайди.

Маълумот учун, Хави жорий мавсум «буқалар» сафида 17 ўйинда майдонга тушиб, 5та гол ва 4та ассист қайд этган. Париж жамоаси мавсум якунида 21 ёшли ўйинчисини ортга қайтармоқчи эди.

Қайд этиш жоиз, ушбу трансфер «Лейпциг» бошқарувида иш бошлаган Юрген Клоппнинг раҳбарлик лавозимига тайинланганидан кейинги дастлабки катта келишувига айланди.