«Сантос» президенти Неймарнинг клубга қайтишини тасдиқлади.

Аввалроқ «Ал Ҳилол» 32 ёшли ҳужумчи билан шартномани бекор қилгани ва футболчи Бразилия клубига қайтишга яқин эканлиги хабар қилинганди. 

«Кечагидек эсимда: абадий сардоримиз Зито Алеман билан бирга келиб, янги истеъдод ҳақида гапириб беришганди. У боланинг исми Неймар эди. У даҳога айланиб, «Сантос», Бразилия ва бутун дунёдаги одамларнинг қалбини забт этди. 

Неймар, сен орзуларингни амалга ошириш учун «Сантос»ни тарк этдинг. Аммо ўшанда бизга «мен кетяпман, лекин қайтаман» деган ваъда бериб кетгандинг. Ёдингдами? Ишончим комилки, бу иборалар йиллар давомида ҳамроҳ бўлди.

Неймар, қайтадиган пайт келди. Ўз халқингга, уйингга қайтиш вақти келди. Хуш келибсан, болаликдаги уйингга! Сантослик бола! Мухлислар сени кутишмоқда», — деди президент Марсело Тейшейра.

Неймар 2009 йилдан 2013 йилгача «Сантос» сафида ўйнаган. У жамоа билан Бразилия кубоги,  Либертадорес кубоги, Рекопа ва 3 бор Паулиста турнирини ютган.