Суперлига янги мавсуми ва Элит ОЧЛ баҳсларига тайёргарлик кўраётган «Пахтакор» клуби навбатдаги трансферини эълон қилди.

Клуб матбуот хизмати хабарига кўра, колумбиялик ҳужумчи Брайан Риаскос «Пахтакор» футболчисига айланди.

1994 йил Колумбияда таваллуд топган Риаскос Ўзбекистонга Хитойнинг «Циндао Вест Кост» жамоасидан ташриф буюради. Чин юртида 16 та ўйинда 6 та гол урган ҳужумчи «Пахтакор»да 94-рақамда ўйнайди.

«Ўзбекистоннинг энг кучли жамоасида тўп тепишимдан хурсандман. Туғилган йилимга монанд 94-рақамни танлайман ва «Пахтакор» мухлисларини ўз голларим билан хурсанд қиламан», - дейди Риаскос.

Маълумот учун, Риаскос фаолияти давомида «Газиантеп», «Металлист», «Насьонал» каби клубларда тўп тепган.

Аввалроқ, клуб Жонатан да Сикейра, Лукка Жонатан, Жовиньо Фламирион ва Башар Ресан сингари легионерлар билан шартнома имзолаганди.