Янги футбол мавсуми олдидан ўз таркибини кучайтираётган «Насаф» навбатдаги трансферини эълон қилди.

Янги мавсумда Суперлига ва Элит ОЧЛда иштирок этадиган Қарши клуби Драган Черандан кейин яна бир ҳужумчи Рубин Ҳебай билан шартнома имзолади.

«Ўзбек футбол мухлисларига бегона бўлмаган албаниялик ҳужумчи Рубин Ҳебай энди бизнинг жамоада тўп суради!

Фаолияти давомида Албания, Украина, Саудия Арабистони, Тунис жамоаларида, 2023 йилда Андижоннинг «Андижон» жамоасида тўп сурган ҳужумчи янги мавсумни жамоамиз таркибида бошлайди. Футболчи жамоамиз билан бир йиллик келишувга эришди. «Насаф» оиласига хуш келибсан, Рубин! Голлар ва ғалабалар кутиб қоламиз!», - дейилади клуб хабарида.

Маълумот учун, албаниялик 26 ёшли ҳужумчи 2024/25 йилги мавсумда Туниснинг «Сфаксьен» клуби шарафини ҳимоя қилиб, Тунис чемпионатида 6 ўйинда 2та голга муаллифлик қилган.