«Барселона» бош мураббийи Ҳанси Флик Ла Лига 20-туридан ўрин олган «Хетафе» (1:1) билан ўйиндан кейин ўз фикрларини билдирди. 

«Ғалаба қозонишни хоҳлагандик ва бунинг учун бизда имконият бор эди. Кўпроқ гол ура олмаганимиздан хафамиз. «Хетафе» майдонида ўйнаш қандай қийин эканлигини кўришингиз мумкин. Улар яхши ҳимояланишади. Биз вазиятлар яратдик, аммо якунда ноаниқ ўйнадик. 

Давом этишимиз керак. Такрор айтаман, айниқса, биринчи бўлимда бизда имкониятлар бўлди. Лекин ўйлайманки, бизга тўп узатишда аниқлик етишмади.

Кундега нисбатан қўполлик? Бу стадион ҳар бир эпизодга, ҳар бир контактга шафқатсиз муносабатда бўлди. Мен ҳеч қачон бундай ҳолатни бошдан кечирмаганман. Бу — мен учун янгилик, бунга кўникишим керак.

Касадонинг алмаштирилиши? Биз ниманидир ўзгартирмоқчи эдик ва шундай ҳам бўлди. 

Педрининг ассисти? Бу ажойиб узатма эди, бу — унинг кучли томонларидан бири», — дея германиялик мутахассиснинг сўзларини келтиради AS.