Тайсон Фьюри украинлик Александр Усикка қарши иккинчи мағлубиятидан сўнг фаолиятини якунлаганини эълон қилди.

Британиялик 36 ёшли боксчи супероғир вазн тоифасида дастлаб мутлақ чемпионлик унвони учун жангни бой берган бўлса, кейин WBC, WBA Super, WBO, IBO ва The Ring унвонлари учун жангда ютқазганди.

«Буни қисқа ва лўнда қилиб айтаман – боксдан кетишимни эълон қилмоқчиман. Бу ажойиб саргузашт бўлди, фаолиятимнинг ҳар бир лаҳзасидан завқ олдим ва айнан шу жойда якунламоқчиман», - деди Фюри Instagram саҳифасидаги видеомурожаатида.

Қайд этиш жоиз, Фюрининг Усикка қарши жангларда ютқазиши унинг профессионал фаолиятидаги ягона мағлубияти бўлди. Тайсон фаолияти давомида 34 жангда ғалаба қозонган, бир жанг дуранг билан якунланган.