«Милан» бош мураббийи Сержиу Консейсау А Серия 20-туридан ўрин олган «Каляри» (1:1) билан ўйиндан сўнг ўз фикрларини билдирди. 

«Мен ҳар томонлама кўпроқ нарсани кутгандим. Ростини айтсам, таркиб сифатини ҳисобга олсак, биринчи бўлим 13 йиллик  мураббийлик фаолиятимда энг ёмони бўлди. 

Бизга ҳаракатчанлик етишмади, ўйин суръати жуда секин эди. «Каляри» майдоннинг учинчи қисмига чекинишга муваффақ бўлди, уларнинг стратегияси ҳимоявий ўйнаш эди. Биз бунга тайёргарлик кўрдик ва бўш ҳудудларни топишимиз керак эди, лекин буни қандай қилишни тушунмадик.

Иккинчи бўлим яхшироқ ўтди, дарвоза томон 25 та зарба бердик. «Каляри» вақтга ўйнай бошлади ва тушунишимча, бунақаси — Италияда одатий ҳол. Лекин кейин ҳакам 5 дақиқадан кўпроқ вақт қўшиши керак. Бу баҳона ҳам эмас, суперкубокдан кейинги чарчоқ ҳам эмас — биз яхшироқ ўйнашимиз керак эди, аммо барибир бу омилларни эътиборсиз қолдириб бўлмайди», — дея португалиялик мутахассиснинг сўзларини келтиради Football Italia.