«Наполи» бош мураббийи Антонио Конте жамоа етакчиларидан бири Хвича Кварацхелия клубни тарк этаётганини маълум қилди.

«Кварацхелия клубни тарк этишга рухсат сўради. Хвича билан гаплашдим, у жамоани яқин орада тарк этиш ниятида эканини маълум қилди», - дея Контенинг сўзларини келтиради Фабрицио Романо.

RMC Sport хабарига кўра, Париж клуби «Наполи» вингерига Неаполдаги маошидан 4 баробар кўп маош таклиф қилган. Грузия миллий жамоаси ўйинчиси «ПСЖ» вакилларига Франция чемпионатига кўчиб ўтишга тайёрлигини билдирган.

Аввалроқ, «Наполи» Хвича бўйича позициясини ўзгартиргани, клуб ўтган мавсум уни сотиб юборилмайдиган ўйинчилар қаторига киритганди, бу йил эса таклифларни кўриб чиқишга тайёрлиги хабар қилинганди.

Қайд этилишича, «ПСЖ» раҳбарияти Хвича учун асосий харидор эканини тушуниб турибди. Шу боис, парижликлар Хвичани сотиб олиш шарти билан ижарага олиш ёки келишувнинг бир қисмига жамоа ҳимоячиси Милан Шкриньярни қўшишни истамоқда. Неапол клуби эса ҳозирча бунга розилик билдиргани йўқ.

Маълумот учун, 23 ёшли вингернинг Неаполдаги йиллик маоши 1,5 млн еврони ташкил қилади. Футболчи клубда энг кўп маош олаётган Лукаку қаторида – йиллик 6 млн евро олишни истамоқда. Париж клуби эса бу маошни беришга тайёр.