Абдуқодир Ҳусановнинг «Ланс»дан «Манчестер Сити»га трансфер қилинишида таниқли агент Жорже Мендеш Франция клубига ёрдам берган.

The Athletic нашри хабарига кўра, португалиялик таниқли футбол агенти ўзбекистонлик футболчининг трансфер нархи бир ой ичидаёқ 20 миллиондан 40 миллион еврога етишида муҳим рол ўйнаган.

«Бир ой аввал француз клуби Ҳусановнинг нархини 20 миллион еврога баҳолаган, кейин эса Мендешга футболчининг трансферини ташкил қилиш ваколатини берган. Жорже «Манчестер Сити» билан келишувга эришган ва энди бу клуб Ҳусанов учун 40 миллион евро тўлайди», - дея ёзади The Athletic. 

Ҳусанов 2023 йилдан бери «Ланс»да ўйнаб келаётганди. Унинг клуб билан шартномаси 2027 йилгача мўлжалланган эди. Ҳусанов «Сити»да дам олиш кунлари тиббий кўрикдан ўтгач, сўнг клуб томонидан трансфер ҳақида расман эълон қилиниши кутилмоқда.

Эслатиб ўтамиз, «Ман Сити» Ҳусановни сотиб олиш бўйича 2024 йилнинг декабр ойида музокара бошлаганди. Манчестерликлар бош мураббийи Пеп Гвардиоланинг келишувни тезроқ амалга ошириш бўйича сўровидан кейин музокаралар тезлашган ва якунда Ҳусановнинг «Сити»га ўтиши ҳал бўлганди.

Маълумот ўрнида, Абдуқодир Ҳусанов Англия Премьер-лигасига кўчиб ўтган ўзбекистонлик илк футболчига айланди. Бунгача Ўзбекистонда туғилган Питер Одемвинге АПЛ клублари шарафини ҳимоя қилган бўлса-да, у Нигерия миллий жамоаси шарафини ҳимоя қилган. Шунингдек, ўтган йил 19 ёшли Муҳаммадали Ўринбоев «Пахтакор»дан «Брентфорд»га ижарага берилган бўлса-да, клубнинг ёшлар жамоасида ҳаракат қилди ва асосий жамоада ўйнамай, яна Ўзбекистонга қайтганди.