Хвича Кварацхелия фаолиятини «ПСЖ»да давом эттиришни истамоқда.

RMC Sport хабарига кўра, Париж клуби «Наполи» вингерига Неаполдаги маошидан 4 баробар кўп маош таклиф қилган. Грузия миллий жамоаси ўйинчиси «ПСЖ» вакилларига Франция чемпионатига кўчиб ўтишга тайёрлигини билдирган.

«Наполи» Хвича бўйича позициясини ўзгартирган. Клуб ўтган мавсум уни сотиб юборилмайдиган ўйинчилар қаторига киритганди, бу йил эса таклифларни кўриб чиқишга тайёр.

Қайд этилишича, «ПСЖ» раҳбарияти Хвича учун асосий харидор эканини тушуниб турибди. Шу боис, парижликлар Хвичани сотиб олиш шарти билан ижарага олиш ёки келишувнинг бир қисмига жамоа ҳимоячиси Милан Шкриньярни қўшишни истамоқда. Неапол клуби эса ҳозирча бунга розилик билдиргани йўқ.

Маълумот учун, 23 ёшли вингернинг Неаполдаги йиллик маоши 1,5 млн еврони ташкил қилади. Футболчи клубда энг кўп маош олаётган Лукаку қаторида – йиллик 6 млн евро олишни истамоқда. Париж клуби эса бу маошни беришга тайёр.