«Реал» бош мураббийи Карло Анчелотти Испания Суперкубоги яримфиналидан ўрин олган «Малйорка»га (3:0) қарши ўйиндан сўнг ўз фикрлари билан ўртоқлашди. 

«Ўйин охиридаги зиддият? («Реал»дан Беллингҳэм ва Асенсио рақиб ҳимоячиси Маффео билан тортишди) Буларнинг барчаси кераксиз эди, ўйин аллақачон тугаганди. Мен ҳеч кимни айбламайман: на «Малйорка», на «Реал» футболчиларини. Аммо бундай жанжал керак эмасди. Футболчилар бироз қизишиб кетишди ва мен Маффеони тинчлантиришга ҳаракат қилдим. Охир-оқибат, ҳеч қандай ёмон нарса бўлмади, лекин бундай тугатиш керак эмасди.

Ўйинни яхши бошладик, аммо гол уришимиз керак бўлганда, уддалай олмадик. 90-дақиқагача гол билан боғлиқ муаммоларга дуч келдик, аммо бу жуда қийин бўлган ўйин натижасидир. Ҳар томонлама мақсадимизга эришишга ҳаракат қилдик. Рақиб яхши ҳимояланди ва вазиятлар ҳам яратди, чунки улар ҳавода жуда хавфли. Ҳамма нарса бўлиши мумкин эди, аммо биз ҳимояда анча мувозанатли ҳаракат қилдик. Биз яхшироқ эдик. Олдинда финал.

Беллингҳэм? У биз учун жуда муҳим. 4 ҳужумкор ўйинчи бўлса, ҳамма нарса содир бўлиши мумкин. Уларнинг барчаси жуда хавфли, бу ҳаммага аён. Аммо гап нафақат маҳорат, балки фидойилик ҳақида ҳам. Сўнгги пайтларда улар жуда яхши.

Валвердени алмаштирганим? Унда худди Беллингҳэмдагидек каби мушаклар зўриқиши бўлди», — дея италиялик мутахассиснинг сўзларини келтиради AS.