«Милан» бош мураббийи Сержиу Консейсау Италия Суперкубоги финалидаги «Интер»га (3:2) қарши ўйиндан сўнг ўз фикрлари билан ўртоқлашди. 

Португалиялик мутахассиснинг жамоаси 0:2 ҳисобида ортда бора туриб, якунда иродали ғалабани қўлга киритди. 

«Жамоа учун жуда хурсандман — осон бўлмади, муҳит зўр эмасди. Бизда муҳим деталлар устида ишлаш учун бир неча кун бор эди ва икки жуда кучли жамоага қарши тура олдик (яримфиналда «Ювентус» мағлуб этилди). 

Мўжиза бизнинг ғояларимизни қабул қилган ўйинчилар томонидан амалга оширилди. Ҳали кўп нарсаларни яхшилашимиз керак. Камтарлик билан лигада қолган 4 ойни яхши ўтказа оламиз ва Чемпионлар Лигасида ҳам яхши натижаларга эришишга уринамиз. Ғалабани нишонлаяпмиз, аммо эртадан бошлаб «Каляри» билан ўйин ҳақида ўйлаймиз.

Ҳужумдаги бир нечта хатоларни тузатдик, аммо иккита оғир зарба қабул қилиб олдик, 1-бўлимда қўшиб берилган вақтда тўп ўтказиб юбордик, кейин эса нотўғри талқин туфайли яна гол ўтказдик. Аммо бу шуни англатадики, «Милан» характерга эга ва биз иккита ажойиб жамоага қарши камбэк қилишга муваффақ бўлдик. Танаффус вақтида мураббий аралашиб, вазиятни тўғрилаши керак — мен шунинг учун маош оламан.

Агар биз зичроқ ўйнашни истасак, унда барча боғламлар муҳим ва ўйинчилар орасидаги масофа кичик бўлиши керак. Яна буюк «Милан»га айланиш учун бизга кўпроқ жасорат керак. Қўрқмаслигимиз керак, бунинг устида ишлаяпмиз. Футболчилар жамоа сифатида биз нимани хоҳлашимизни тушунишади», — дейди жамоага келганига бир ҳафта бўлган мураббий.