2019 йил Суперлигага қайтган «Сурхон» Термиздаги стадиони талабга жавоб бермаётгани сабабли 2021 йилдан буён уй ўйинларини Тошкент ва Самарқандда тўп суриб келаётганди.
«Стадиондаги муаммолар сабаб сўнгги йилларда рақибларини бошқа шаҳарларда қабул қилган «Сурхон» 2025 йилги мавсумдан эътиборан ўз уйига қайтади.
Термиздаги «Сурхон» арена майдони, унинг дренаж ва суғориш тизими, шунингдек, стадион ёритиш тизими Лига талаблари асосида таъмирдан чиқарилган. Шунингдек, стадион ортида яна битта табиий майдон бунёд этилган бўлиб, бу ерда U21 жамоаси ўз рақибларини қабул қилиши кўзда тутилган», - дейилади ПФЛ хабарида.
Эслатиб ўтамиз, «Сурхон» клуби 2022 йилда таниқли тадбиркор Бахтиёр Фозилов томонидан сотиб олинган эди. Унга тегишли Eriell компанияси Термиздаги ўйингоҳни реконструкция қилиб берган. Ушбу компания Сурхондарё клубига ҳам ҳомийлик қилиб келмоқда.