«Барселона» Ламин Ямалнинг Испания Суперкубогига тикланишига ишонмоқда.

Вингер 15 декабр куни «Леганес» билан ўйинда (0:1) тўпиғидан жароҳат олган ва шундан сўнг «Атлетико»га (1:2) қарши баҳсни ўтказиб юборганди. 

Ўшанда Ямал 3-4 ҳафта ўйнай олмаслиги, бу эса унинг Испания Суперкубогидаги иштирокини шубҳа остига қўйиши хабар қилинганди. 

Маrca'нинг ёзишича, «Барселона» оптимистик кайфиятда ва Ямалнинг 8 январ куни Саудия Арабистонида бўлиб ўтадиган «Атлетик»ка қарши Суперкубок яримфинал ўйинига қадар тикланишига ишонмоқда. 

Футболчининг тикланиш жараёни яхши кетмоқда, бир неча кундан кейин Ламин қолган ўйинчилар билан машғулотларга қайтиши керак.

Шунга қарамай, Каталония клуби эҳтиёткорлик билан ҳаракат қилмоқчи. Ямални таркибга қўшиш қарорини бош мураббий Ҳанси Флик қабул қилади.