Раул Асенсио «Реал»да ўйнаш истаги туфайли «Ман Сити» хўжайинларига рад жавобини берган. 

Ўтган ёзда «Манчестер Сити» ва дунёнинг бир неча клубларига эгалик қилувчи City Football Group 21 ёшли футболчига таклиф билан чиққанди.

АS хабарига кўра, улар Асенсиони 6 миллион еврога сотиб олиб, «Жирона»да ўйнатмоқчи бўлишган. Бироқ Раул ёзги мавсумолди ўйинларида «қаймоқранглилар»нинг асосий жамоасида ўйнамаганига қарамай, таклифга рад жавобини берган ва мавсумни «Реал Кастилия» билан бошлашга рози бўлган. Ўшанда у асосий таркибда имконият бўлишини кутишга қарор қилган. 

Ноябр ойида мадридликлар бош мураббийи Карло Анчелотти бир қанча ҳимоячиларнинг жароҳатларидан сўнг футболчини асосий таркибга киритди ва у билан бирга жамоа Ла Лигада кетма-кет 3 ғалабага эришди. Ўша баҳсларда «қироллик клуби» бирор марта тўп ўтказмади. Испаниялик футболчининг ўзи эса дебютидаёқ голли узатма амалга оширди. Шунингдек, Асенсио Чемпионлар Лигаси доирасида «Ливерпул»га (0:2) қарши ҳам ўйнади.

Олдинроқ «Реал» Раулга маоши оширилган ҳолда янги шартнома таклиф қилмоқчи эканлиги хабар қилинганди. Амалдаги келишув 2026 йилнинг ёзигача мўлжалланган.