2024 йилги мавсум якунида «Пахтакор» клуби раиси Жаҳонгир Ортиқхўжаев ОАВ вакиллари билан матбуот анжумани уюштириб, жамоанинг бу йилги натижаси, клубдаги воқеалар, Максим Шацкихнинг бош мураббийликни тарк этиши ва жамоанинг янги бош мураббийи Педро Морейра билан 2025 йилда қандай режалар қилинаётганини ҳақида маълумот берди.
«Мақсадимиз чемпионлик эмасди, умуман бу йил Тошкент клублари ачинарли натижа қайд этди»
- Авваламбор, сизларни кириб келаётган Янги йил билан табриклаймиз. Якунланаётган 2024 йилда «Пахтакор» учун қийин вазиятлар бўлди, керакли ўринни эгаллай олмадик. Бунинг учун жамоа мухлисларидан узр сўраймиз. Лекин очиқ айтиш керак, йил бошида чемпионлик мақсадимиз йўқ эди. Кўпроқ ёшларга имконият беришни кўзлагандик. «Пахтакор» бир йиллик эмас, кўп йиллик жамоа. Шундан келиб чиқиб, жамоанинг эртасини ўйлаб, узоқ йиллик стратегия учун ёшларга ишондик. Бу йил Суперлигада 6-ўринни эгалладик, бу натижани қониқарсиз деб бўлмайди.
Ўзи умуман олганда, бу йил Тошкент клубларининг натижаларини ачинарли деса ҳам бўлади. Мана, «Локомотив» лигадан тушиб кетди, «Олимпик» охирги ўринларда, «Бунёдкор» турнир жадвалида қийин шароитда эди. Тошкент жамоаларига нима бўлди, билмадим-у, пойтахт клублари йилни кўнгилдагидек ўтказмади. Энди янги бош мураббий билан давом этамиз. Якунланган мавсум учун барчага миннатдорчилик билдириб, ҳакамларга ҳам раҳмат айтамиз. Тўғри, бироз қизишганда мухлислар уларни ҳақорат қилади, аммо ҳакамларга ҳам осон эмас, улардан бунинг учун узр сўрайман.
«Пахтакор»нинг фақат Ўзбекистонда эмас, жаҳонда ҳам обрўи бўлишини хоҳлардим»
- Мен истаган «Пахтакор» қандай бўлиши керак? Биласизми, биз «Пахтакор» билан бирга улғайдик, ёшлигимиздан жамоанинг ҳар бир ўйинига борардик. Жамоада ўйнаганлардан Миржалол Қосимовни ўзбек футболи афсонаси деб биламан, Игор Шквирин ўйинларини ҳам кузатганмиз. «Пахтакор» Осиёда илғор жамоалардан бири, дунёда ҳам ўзига яраша обрўси бор. Европага борганимизда ҳам кўпчилик «Пахтакор»ни билишади, жамоа ўйинларини кузатишганини айтишади. Келажак ҳақида гапирсак, «Пахтакор» бир йиллик чемпион эмас, ўзига яраша кучли, обрў-эътибори бўлишини, Осиёдаги ҳар қандай жамоа билан тенгма-тенг, елкама-елка кураш олиб бора оладиган жамоа бўлишини истайман. Барча ҳаракатларни шу мақсадда олиб боряпмиз. Буни қила олиш мумкинми? Ҳа. Фақат Ўзбекистонда эмас, Осиёда, жаҳонда ҳам обрўи бўлишини хоҳлардим.
Мисол учун, Марокашни ЖЧ-2022даги иштирокини кўрдик, Исландияни ўйинларини айтиш мумкин. Хорватияни қандай ёриб чиққанини кўриш мумкин. Клублар ичидан ҳам Молдованинг кичик «Шериф» клуби Европада сенсациялар қайд этганини кўрдик ёки «Шахтёр» ҳам Европада ўз обрўсига эга эди. Улардан кам жойимиз йўқ, мен ҳам клуб билан шунга ҳаракат қиламиз.
Йоаҳим Лёв билан учрашув, стадион ва Шацкихнинг кейинги тақдири ҳақида
- Ҳа, Йоахим Лёв кўришдик биз. Лекин бу учрашув уни мураббийликка чақириш учун эмасди. Оддийгина бир жойда ўтириб, бирга овқатланишга тўғри келиб қолди. Мен борган шаҳарга у ҳам борган экан. Шу холос.
Стадион бўйича режалар? «Пахтакор» стадионини баҳордан таъмирлашни бошлаймиз, чимини эса ҳозирда ФИФА стандартларига мос тарзда янгилаймиз. Худо хоҳласа, баҳордан ўз майдонимизда ўйнашни бошлаймиз.
Максим Шацких нега истеъфога чиқарилмоқда? Авваламбор, унга ўз миннатдорчилигимни билдираман. Бош мураббий сифатида 3 йил ишлади. Икки марта чемпионликни олиб берди, бу йил эса унинг олдига чемпион бўламиз деб, вазифа қўймагандик. Чунки кучли ўйинчиларимизни бошқа жамоаларга қўйиб юборгандик. Биз асосан ёшлар билан ҳаракат қилиб кўрмоқчи эдик ва катталар 6-ўринни олган бўлса-да, қолган ёш тоифасидаги U18, U21 жамоаларимиз Ўзбекистон чемпиони бўлишди. Мақсадимиз ёшларга имкон бериш эди.
Максим Шацких истеъфо бергани йўқ, ҳа фақат бош мураббийликдан кетди, у энди директорлар кенгашида менга маслаҳатчи бўлиб ёнимда бўлади, ёрдам беради. Бунинг учун унга миннатдорчилик билдираман. Яъни, у клубда қолди, янги мураббийга ҳам керак бўлган ёрдамини беради. Шацкихдан янги мураббийга ўтиш даврини енгироқ ўтишига ёрдам бериши керак.
«Насаф» ҳақли тарзда чемпион бўлди»
- Ўзи, айтинглар-чи, Ўзбекистонда 3 йил ичида жамоасини икки бор чемпион қилиб, кейин 6-ўринни олган мураббий борми? Тарихида бўлганми? Рўзиқул Бердиевни ҳурмат қиламан, «Насаф»ни неча йилдан буён бошқараяптилар? 12 йил! Шунча йил ичида биринчи бор шу йил чемпион қилдилар. У киши билан бир бор кўришганман, жуда ҳурмат қиламан, яхши одам. «Насаф» ҳақли тарзда чемпион бўлди. Бунгача жамоага келгани билан икки бор чемпион қилган Арвеладзе бор эди, ундан кейин борми? Йўқ, демак Шацкихдан миннатдор бўлишимиз керак.
Янги мураббийимиз Морейра билан «1+1» кўринишида шартнома туздик. Унинг ўзи чемпионлик учун курашмоқчи. Шунга ҳаракат қиламиз.
«Пахтакор»даги саботажлар ҳақида
- Молиявий масалалар ҳақида гапирадиган бўлсам, «Пахтакор» бу борада ҳеч кимнинг бир кунлик ойлигини ҳам қолдирмай, тўлаб берадиган Ўзбекистондаги ягона жамоа бўлса керак. Энди саботаж ҳақида гапирадиган бўлсам. Кўп футболчиларимиз чемпион бўлиб чарчаб кетган, яъни бундан тўйган. Уларни фақат кейинги йилги шартнома қизиқтиради. Улар билан шартнома қилишни хоҳламаймиз. Чунки улар майдонда бўлса ҳам, ўйинда бор йўқлиги сезилмайди. Ўтган йили ҳам шундай ҳолат юз берди ва мен турнир тугашига 10 тур қолганда ёшлардан Диёр Холматовни сардор қилиб қўйдим. Улар ёши катта ўйинчиларга дарс бергандек бўлишди. Хоҳлардимки, ўйинчилар фақат жамоанинг пули эмас, клубда ўйнашни шараф деб билишсин. Фақат маошни, молиявий масалани ўйламаслик керак. «Пахтакор»да ўйнаш – шараф бўлиши керак. Молиявий масалада эса жамоада бир кун ҳам ойлик маошни кечиктирганимиз йўқ.
«Пахтакор»нинг 2024 йилги харажатлари 100 миллиарддан ошди, 2025 йилда бюджетимиз яна ошади»
- «Пахтакор» қачон фойда олиб келади? Фақат Ўзбекистон клублари эмас, дунёда ўзи фақат 10-15 та клуб фойда келтирса керак. Яъни, Англия, Испания ва яна қолган чемпионатлар етакчи клублари. Жуда кўпи эса зарарда.
Ўзи «Пахтакор»ни фойда келтириши учун эмас, ёшликдан шу клубга мухлис бўлганимиз учун ёрдам беряпмиз. Барибир, кимдир қилиши керак-ку! Шу ерда ўсдик, улғайдик, кимдир қўллаб-қувватлаши керак. Бугун имкониятимиз бор ёрдам беряпмиз, имконият бўлмаганда, узр, ҳозир қўлимиз калталик қиляпти, деб айтамиз. Ўзбекистонда футболдан даромад келишига мен ишонмайман. Тадбиркор сифатида бунга ишонмайман. Бошқа клублар ҳам бундан пул тополмаса керак.
2024 йил «Пахтакор»нинг сметаси тахминан 100 миллиард сўмдан ошди. 2025 йилда смета ошади, чунки тез орада «Пахтакор» стадиони реконструкцияси ҳам бошланади, таклиф қилинадиган янги ўйинчилар бор.
«Черан энди мураббийликка ўқиса яхши бўларди, у кейинги йилги талабга жавоб бермайди»
- Камолиддин Тожиев, Черан ва Собирхўжаевлар кўринмаяпти? Улар ҳам икки ойга таътилга чиқишганди. Биласиз, Драган Черан 38 ёшда, менимча, у мураббийликка ўқиса яхши бўларди. Кейинги йил Черанни «Пахтакор»да кўрмаяпмиз. Черандан кучли мураббий чиқади. Ҳамма обрўси борида тугатгани чиройли, деб ўйлайман. Эртага жароҳат олиб, қийин вазиятда тугатгандан кўра шу яхшироқ. Уни фидойи инсон деб биламан. Черан кейинги йилги мақсадимизга мос эмас.
Черан билан хайрлашув учрашуви? У ҳали ҳеч қаерга кетаётгани, Ўзбекистондан кетаётгани йўқ-ку! Қандай хайрлашув қилиш керак? Мухлислар билан? Ўзи ўша мухлисни ўзи йўқ-ку, 500 киши келаяптими йўқми стадионга. Агар хайрлашувга талаб бўлса, чиройли ташкил қилиб берамиз, гап йўқ. Балки, унга бошқа клубларда эҳтиёж бордир, бошқа клубда ўйнар. Аммо Черан «Пахтакор» қўяётган кейинги йилги талабларга тўғри келмайди. Футболчи жойни банд қилдими, 90 дақиқа югуриши керак. У ҳозир аввалгидек югурмаяпти, бизга мос эмас.
Жамоани Павел Павлюченко, Кими Мерк ва Драган Черан тарк этади. Ироқлик Башар Ресан билан келишувга эришдик. Бош мураббий билан маслаҳатлашган ҳолда кучайтирамиз.
«Янги мураббийнинг маошини очиқлай олмаймиз, натижа қилиб берса бўлди»
- Янги мураббий Педро Морейранинг маоши? Бош мураббий шартномасида маошни эълон қилмаслик банди бор, шу боис буни очиқлай олмаймиз. Қанча бўлса ҳам ўзига буюрсин. Бизга яхши футбол намойиш этиб, натижа қилиб берса бўлди.
Янги бош мураббийнинг ишига аралашмаймиз. Бунга ҳеч кимнинг ҳаққи йўқ. Уни ўзбеклаштирилиб, бир ҳафтадан кейин чойхонадан чиқа олмайдиган бўлиб қолмайдиган қилмаслигимиз керак.
Тошкентга 4та клуб кўп эмасми? Шахсий фикримча, Тошкентга 4 та клуб кўп, лекин бу масалада ҳеч нима қила олмайман. Фикрингиз тўғри, аммо гапимни, илтимос, кесган ҳолда чиқариб юборманглар. Қандайдир фитнага аралашиб қолишни истамайман. Аммо фикрингиз ўринли – менинг ҳам фикримча, 4та клуб Тошкент учун кўп, - деди Жаҳонгир Ортиқхўжаев.