«Манчестер Юнайтед» бош мураббийи Рубен Аморим Европа Лигаси 5-туридан ўрин олган «Буде-Глимт»га (3:2) қарши ўйиндан сўнг ўз фикрлари билан ўртоқлашди.

Ушбу баҳс 39 ёшли мутахассис учун манкунианликлар устози сифатида «Олд Траффорд»даги дебют бўлди. 

«Албатта, барчасини кўряпман: яхши лаҳзалар, оғир дамлар. Якунда бироз чалкашлик бор эди, лекин йигитлар ажойиб ишлашди. Улар югуришди, босим қилишди, охирги 3 кун давомида ишлаганларимизни кўрсатишга уринишди ва биз ғалаба қозондик. 

Стадионнинг ярми мени танимайди, Португалиядан келганман ва бу клуб учун ҳали ҳеч нарса қилганим йўқ. Лекин мухлислар сабаб ўзимни уйдагидек ҳис қилдим. Буни фаолиятим охиригача эслаб қоламан.

Биз яхши бошладик, аммо кейин иккита қарши ҳужумда голлар ўтказиб юбордик. Футболчиларнинг бизнинг услубда ўйнашга интилиши менга ёқади. Аввал тўпни осонликча бериб қўядиган муаммоларга дуч келганмиз – уни сақлаб туришга ҳаракат қилишимиз керак. Футболчилар астойдил ҳаракат қилишмоқда ва ўйлайманки, биз ғалаба қозонишга ҳақли эдик», — дея Аморимнинг сўзларини келтиради ВВС.