ЖЧ-2026 саралаш босқич 6-тури доирасидаги Қирғизистон – Эрон учрашувидан олдин форслар бош мураббийи Амир Ғалинойи ушбу ўйин ва қайси жамоалар ЖЧга чиқиш учун жуда яхши имконият ҳосил қилгани ҳақида гапирди.

«Авваламбор, Қирғизистон футбол федерациясига ўйиндан икки кун аввал майдонда машғулотлар ўтказишга рухсат бергани учун миннатдорчилик билдираман. Бу ерда бир йил аввал бўлгандим ва ҳозир инфраструктурада яхши ўзгаришлар бўлганини кўриб турибман. Ўтган давр мобайнида Эрон миллий жамоаси бош мураббийи сифатида 29 ўйинни ўтказдим, унда жамоам рақиблар дарвозасига 71та гол урди. Жамоамнинг ўйин фалсафасини ўзгартирдим, биз 18 йил ичида ФИФА рейтингида 19 ўринга юқориладик. Ҳозирга келиб ЖЧ-2026 йўлланмаси учун курашаётган Осиёнинг 18 жамоаси орасида фақат биз, Япония ва Жанубий Корея очколар билан мундиалга чиқиш учун жуда яхши имкониятга эга бўлиб турибди. Бунинг учун қўл остимдаги барча тажрибали ўйинчиларга миннатдорчилик билдираман.

Қирғизистон миллий жамоаси ҳақида гапирадиган бўлсам, бу яхши шаклланган рақиб. Эртанги ўйинда улар кўпроқ қарши ҳужумга эътибор қилишини биламиз. Айниқса, уларда қарши ҳужумда жуда яхши ўйинчи – Жоэл Кожо бор. Жамоани россиялик тажрибали мураббий бошқармоқда. Ҳимояда Жоэл Кожодан эҳтиёт бўлишимиз талаб этилади.

Ҳимоямиз ҳам мени қониқтирмоқда – саралаш босқичининг сўнгги 4 ўйинида фақат бир марта (Эрон – Қатар 4:1) тўп ўтказдик.

- Жоэл Кожо Эрон чемпионатига кўчиб ўтиши ҳақида кўп ёзилмоқда. Сизнингча, у Эронда ўзини қай даража кўрсата олиши мумкин?

- Менимча, бу савол эртанги ўйинга боғлиқ эмас. Аммо биз биламизки, Кожо – жуда яхши ўйинчи. Айниқса, қарши ҳужумда жуда хавфли. Шу боис унинг Эрон чемпионатига кўчиб ўтиши ҳам янада ўсишига сабаб бўлади, - дея Амир Ғалинойининг сўзларини келтиради Sport.kg сайти.

Маълумот учун, Қирғизистон – Эрон ўйини эртага, 19 ноябр куни соат 19:00да бошланади.