Неймарнинг янги жароҳатидан кейин тикланиш муддати маълум бўлди.

«Ал Ҳилол» ҳужумчиси Элит ОЧЛ 4-туридаги «Истиқлол» билан ўйиннинг (3:0) 58-дақиқасида майдонга тушди ва 87-дақиқада оғриқ сабаб майдонни тарк этди.

Саудия клуби бош мураббийи Жорже Жезушнинг айтишича, бразилиялик футболчи камида икки ҳафта майдонга туша олмайди.

«Унинг тиззаси тузалган, лекин энди у мушаклар билан боғлиқ муаммоларга дуч келди, чунки узоқ вақтдан бери ўйнамаганди», — деди Жезуш. 

Эслатиб ўтамиз, Неймар тиззасидан олган жароҳати туфайли бир йил ўйнамади. У октябр ойида майдонга қайтди ва иккита учрашувда жами 43 дақиқа ҳаракат қилди.