Карим Бензема «Реал»нинг Винисиус ва Мбаппе ҳужум тандеми ҳақида фикрини билдирди. Франциялик ҳужумчи Винисиусни чап қанотда Мбаппедан яхшироқ деб ҳисобламоқда.

«Винисиусни марказда ёки ўнг томонга ўтказа олмайсиз, чунки у ҳар ўйинда натижа келтиради. Унинг бошқа нуқтага ўтказилиши муаммо бўлади.

Шахсан мен учун Мбаппе марказий ҳужумчи эмас. У Франция миллий жамоасида ҳам ҳужум марказида ўйнаганида унча яхши ўйнай олмайди, бу унинг позицияси эмас. Аммо чап қанотдаги Винисиус ҳам ўйини жиҳатдан унга ўхшаш, даражаси бир хил.

Анчелотти кўп нарсани билади, у бу муаммони ҳал қила олади. Мбаппе –  «тўққизлик» эмас. Ундан кўп нарсани талаб қилишмоқда, босим қилишмоқда, чунки «Реал» –  «ПСЖ» эмас. Аммо Килиан таслим бўлмаслиги шарт. Вини унга ўз қанотини бўшатиб бермайди, чунки у бу чизиқда жаҳонда тенгсиз. Килиан энди ҳужум марказига кўникиши ва чап қанот ҳақида унутиши керак.

Мен Мадридга 21 ёшда келгандим, Килиан эса 25 ёшда келди. Бу битта нарса эмас. У энди «Реал»даги босим билан яшаши ва голлари билан жавоб қайтариши керак. Бунинг учун унда ҳамма нарса бор», - дейди Карим Бензема El Chiringuito TV’даги эфирда.

Маълумот учун, Мбаппе Мадрид клубида жами 14 ўйинда 8та голга муаллифлик қилди.