«Манчестер Юнайтед» бош мураббийи вазифасини бажарувчи этиб тайинланган Руд ван Нистелрой Англия лига кубоги баҳси доирасидаги «Лестер»га қарши учрашувдан аввал ҳали мавсум бой берилмаганини айтиб ўтди.

«Эрик тен Ҳаг ёзда мени «Манчестер Юнайтед»га қайтарди ва унинг мураббийлар штабида бир неча ой ишлаган бўлсам-да, менга берилган бундай имконият учун ундан ҳар доим миннатдор бўлиб қоламан. Унинг жамоадан кетишини кўриш мен учун оғир.

Жонажон жамоамни вақтинчалик бошқараётган бўлсам-да, бу мен учун катта шараф. Ваъда бера оламанки, қайси лавозим ёки вазифада бўлмай, жамоам тақдирини ўзгартириш учун боримни бериб ҳаракат қиламан.

Ҳозирда, бу мавсум ҳали барчасини ўзгартириш учун имконият бор экан, клубда ҳамма борини бериб, биргаликда ишлаш вақти етди. Футболчи ва мураббий сифатидаги тажрибамдан келиб чиқиб айтадиган бўлсам, ўйинчилар, мураббийлар ва мухлислар бирлаша олсагина, «МЮ»ни тўхтатиб бўлмайди», - дейди ван Нистелрой.

Аввалроқ, «МЮ» португалиялик мураббий Рубен Аморимни таклиф этиш масаласида келишувга эришилгани хабар қилинганди. Нистлерой «Лестер»га қарши бугун, соат 00:45да бошланадиган учрашувда жамоани бош мураббий сифатида бошлаб тушади.