Ўзбекистон миллий жамоаси ҳамда «Ланс» клуби ҳимоячиси Абдуқодир Ҳусанов Франция чемпионатидаги ўйинлари билан Европа клублари эътиборига тушмоқда.

Ўзбекистонлик 20 ёшли марказий ҳимоячи Англиянинг «Челси» клуби қизиқиш доирасига тушган. Лондон клубининг скаутлар фаолиятини ёритиб борадиган Х («твиттер») ижтимоий тармоғидаги саҳифасининг ёзишича, «Челси» клуби Абдуқодир Ҳусановни кузатиш учун Францияга скаутларини жўнатган. Улар «Ланс»нинг 26 октябр, шанба кунги «Лилл»га қарши учрашувида ўзбекистонлик 20 ёшли ҳимоячининг ҳаракатларини кузатиши кутилмоқда. 

Қайд этиш жоиз, «Лилл» клуби Франция чемпионати турнир жадвалида «Ланс» билан бир хил – 14тадан очко жамғариб, ёнма-ён 4-5-ўринларни эгаллаб турган бўлса, Чемпионлар лигасидаги сўнгги икки турда дастлаб «Реал»ни мағлубиятга (1:0) учратди, куни кеча эса Мадридда «Атлетико»ни 3:1 ҳисобида мағлуб этганди.

Маълумот учун, Ҳусанов сўнгги турда Франция чемпионати рамзий жамоасидан ўрин олган эди. У 26 октябр, шанба куни соат 23:59да бошланадиган «Лилл»га қарши ўйинни асосий таркибда бошлаши кутилмоқда. 

Аввалроқ, Tribuna.uz сайти Jeunesfooteux.com нашри хабарига таяниб, «Нюкасл» ва «Эвертон» Ҳусановни кузатиб бораётгани ҳақида хабар берганди.