«Манчестер Юнайтед» собиқ яримҳимоячиси, ҳозирда «Фенербаҳче» шарафини ҳимоя қилаётган Фред Европа лигаси 3-тури доирасида собиқ клубига қарши учрашув олди фикрларини билдирди.

«Бу ўйинда собиқ жамоадошларимни кўришдан хурсанд бўламан. Ўзи Европа лигасида қуръа ташлангач, «Юнайтед»га қарши ўйнашимиз маълум бўлгани билан Брунога (Фернандеш) «Сени ўлдирамиз», деб смс-хабар ёзиб юборгандим. У ҳам ҳазил тариқасида «Ўлдиролмайсан, биз сени бир ёқлик қиламиз», деб жавоб ёзганди. Афсуски, дўстим аввалги турда «Порту»га қарши қизил карточка олди ва энди бизга қарши ўйнай олмайди.

Ҳозирда собиқ жамоам қийин даврни бошдан кечираётганини биламан, шунга қарамай «МЮ»ни доим қўллаб-қувватлайман. Ҳалигача уларнинг омадсизлиги ёки мағлубиятидан хафа бўламан. Аммо бизга қарши ўйинда бунинг акси бўлади. Улар пайшанба оқшомида яхши ўйнай олишмайди, деб умид қиламан», - дейди «Фенербаҳче» яримҳимоячиси Фред.

Маълумот учун, «Фенербаҳче» - «МЮ» ўйини бугун, 24 октябр куни соат 23:59да бошланади. Баҳс «ЗўрТВ» орқали трансляция қилинади.