24 октябр куни BMB HOLDING биносининг мажлислар залида BMB Professional Futsal Clubi 2024-2025 йилги мавсум учун янги ўйинчилар тақдимотини ўтказди.

BMB Professional Futsal Clubi ташкил этилганига кўп вақт ўтмаган бўлса-да, катта натижалар қайд этди. Жамоа 2022-2023 йилги мавсумда олтин треблга (Ўзбекистон чемпиони, Ўзбекистон кубоги ва Ўзбекистон суперкубоги соҳиби) эришди. Албатта, чемпион бўлиш — жуда катта ютуқ, аммо унга муносиб бўлиш, уни сақлаб туриш — янада катта масъулиятли вазифа. «Оқ йўлбарслар» 2023-2024 йилги мавсумда ҳам чинакам чемпионлардек иштирок этиб, мамлакат чемпионлигини муддатидан олдин қўлга киритди. Ўз услубига эга маҳоратли футзалчилардан ташкил топган BMB PFC кубок баҳсларида курашларга бой бўлган шиддатли ўйинларда ҳам ғалабаларга эришиб, совринлар музейига яна бир кубокни қўшиб қўйди. 

Клуб тўхтаб қолмоқчи эмас. Келгусида мамлакатда футзални янада оммалаштириш ва ривожлантириш мақсадида футбол ватани ҳисобланадиган Бразилиядан яна ҳам тажрибали, катта футзал маҳоратига эга футзалчилар трансфери амалга оширилди. 

Жамоада легионер футзалчилар сафи янада кенгайди. Жумладан: Сержинио Паулиста, Виктор Ҳуго Пирес Дос Сантос (Витинио) билан шартнома имзоланди. Ўтган мавсумнинг энг яхши ўйинчиси деб топилган Оливейра де Жесус Соуза Ҳебберт (Болт), мавсум юлдузи номинацияси билан тақдирланган Энрике Суарес де Соуза Пауло ҳамда Алекс Диас де Силва, Жоао Флоренcио де Силва Нетолар билан тузилган шартнома муддати узайтирилди. Мураббийлар таркибига профессионал дарвозабонлар мураббийи сифатида 2022-2023 йил айнан BMB PFC'да фаолият юритган, лига ва кубок чемпионлигига муносиб ҳисса қўшган Витор Вианна жалб қилинди.

Шунингдек, футзал бўйича Ўзбекистон миллий жамоасига муносиб футзалчиларни етиштириш мақсадида клуб ёш иқтидорлар — Аширбек Тўлқинов, Бекзод Мирқосимов, Абдулборий Илёсовлар ва Аббосбек Ўлмасбековлар билан шартнома имзолади.

BMB Professional Futsal Clubi Президенти Бекзод Маматқулов янги мавсум олдидан клубнинг асосий мақсад ва устувор вазифаларига ҳам тўхталиб ўтди.

BMB Professional Futsal Clubi Ўзбекистонда футзални янада ривожлантириш, жаҳоннинг энг кучли футзалчиларини жалб қилган ҳолда ўзаро тажриба алмашишни мунтазам давом эттиришни ўз олдига мақсад қилиб қўйган.