«Нефтчи» клуби сафида бир неча ойдан буён машғулотларга ҳам қатнашмаётган Жасур Жалолиддинов клубни тарк этди. 

«Мавсум бошида жамоамиз сафига келиб қўшилган Ўзбекистон олимпия терма жамоамиз сардори жамоамизни тарк этди. Жасур Жалолиддиновга аҳил жамоамиз номидан келажакдаги фаолиятига омад ёр бўлишини, жамоамиз равнақи йўлида қўшган ҳиссаси учун миннатдорчилик билдирамиз», - дейилади клуб хабарида.

Аввалроқ, Жалолиддиновнинг ёзги трансфер ойнасида клуб сафини тарк этишни истагани, аммо клуб у билан хайрлашмагач, футболчи Фарғона жамоасининг машғулотларида қатнашмаётгани ҳақида хабарлар тарқалганди.

Маълумот учун, Жасур 1-даврадан кейин «Нефтчи» сафида кўриниш бермади. У Суперлига жорий мавсумида 10 ўйинда 2та голга муаллифлик қилган.