Ўзбекистон миллий жамоаси яримҳимоячиси Жалолиддин Машарипов ЖЧ-2026 саралаш босқич 3-4-тур ўйинлари доирасидаги Эрон ва БААга қарши ўйин олдидан ўз фикрларини билдириб ўтди.

«Ҳал қилувчи саралаш босқичида қуръа ташланганидаёқ маълум эди – биз футболчилар ҳам, мухлислар ҳам айнан мана шундай жамоаларга қарши ўйинни кутади. Шу дамлар етиб келмоқда. 

Ўйинга ҳамма болалар тайёр. Кайфият ҳам яхши. Олдинги йиғинимиздан кўра, жамоа яхшироқ тайёр. Сабаби мавсум бошланиб олди, кўпчилик яхши спорт формасида етиб келмоқда. 

Эрондан кейин Бирлашган Араб Амирликларига қарши баҳсда кўпроқ Бразилияга қарши ўйнаймиз, десак тўғрироқ бўлади. Чунки бразилиялик футболчилар БАА фуқаролигини олган. Шу боис кўпроқ Бразилияга қарши ўйнаймиз, десак бўлади. Иккита ўйинда кимга ва қандай ўйинчиларга қарши тўп суришимиздан қатъи назар, кераклик очколарни қўлга киритамиз, деб умид қиламан. 

Эрон ҳам, БААнинг ҳозирги таркибини кучсизланган дея оламайман, аммо иккиси ҳам Ўзбекистонни жуда ҳурмат қилишини биламан. Бунга биз ўз ўйинимиз билан эришдик. Уларни ҳам ҳурмат қилган ҳолда уйимизда муҳим бўлган очколарни қўлга киритамиз», - дея Жалолиддин Машариповнинг сўзларини келтиради Tribuna.uz мухбири.

Маълумот учун, гуруҳда 6 очко билан пешқадамлик қилаётган Ўзбекистон миллий жамоаси 10 октябр куни Тошкентда Эронни қабул қилса, 15 октябрда БААга қарши саф тортади. Ҳар иккала учрашув «Бунёдкор» стадионида бўлиб ўтади.