Ўзбекистон кубоги-2024 финали доирасидаги «Навбаҳор» - «Андижон» баҳси олдидан Фарғонадаги «Истиқлол» стадионида матбуот анжумани ўтказилди. Дастлаб андижонликлар бош мураббийи Александр Хомяков финал ҳақида фикрларини билдирди.

«Финални интизорлик билан кутяпмиз. Жуда катта мухлислар армияси биздан нима кутаётганини яхши англаб турибмиз. Уларнинг ишончини оқлаш учун бор имкониятимизни сарфлаймиз. Ҳал қилувчи ўйинга тайёргарлик кўриш учун вақт етарли бўлди. Умид қиламанки, биз барча ишланмалар устида тайёргарлик олиб бордик. Мухлислар ва ўзимизни хурсанд этиш учун ўйинни интизорлик билан кутяпмиз», - дейди мураббий.

«Бу тарихий финал биз учун. Кўпчилигимиз учун бу илк финал. Ҳаммаси яхши бўлади, деб умид қиламан», - дейди жамоа ўйинчиси Фарҳод Соҳибжонов.

«Ҳа, ғалабалар борасида бизда муаммо бор, жамоа анча вақтдан буён юта олмаяпти. Аммо Суперлигадан кўра, кубок бошқача ўйин. Бу финал биз учун жуда муҳим. Шу боис, ўйингача жиддий тайёргарлик кўрдик, аксариятимиз учун бу илк финал. Бу ерда кўпроқ ҳиссиётлар, жамоанинг руҳий тайёргарлиги ҳал қилади.

«Андижон» эртага ниманинг эвазига кубокка эга чиқиши мумкин? «Навбаҳор» бизга нисбатан тажрибали жамоа, улар ўтган мавсумларда Осиё Чемпионлар лигасида тўп суришди, кубок финалларида тўп сурган. Аммо биз кўзлаётган ва умид қилаётган жиҳатлар бор. Шундай экан, тажрибасизлик финалда бизнинг ўйинимизга таъсир қилиб, панд беради, деб ўйламайман.

Бектемир Абдуманноновнинг ўйинидаги пасайиш? Ўйинда 23 нафар ўйинчи тайёргарлик кўрди ва уларнинг барчаси бу баҳсга тайёр. Абдуманнонов масаласига келадиган бўлсак, фақат унинг эмас, ҳамма ўйинчиларда пасайиш бўлиб туради. Бир маромда ўйнаш қийин. Ўйлайманки, ундаги пасайиш даври ўтди ва эртага у ҳам ўз ўйинини кўрсатади деб ўйлайман.

Фарғонадаги стадион жамоага қандай таъсир қилиши мумкин? Ҳа, биз ўтган мавсумнинг ярмини бу ерда ўтказганмиз. Аммо бу жиҳат қандайдир таъсир қилади, деб ўйламайман.

Ҳужумкор ўйнаймизми? Икки жамоа ҳам рақибининг кучсиз жиҳатларидан фойдаланишга интилади. Ким камроқ хато қилса, ўша ютади», - дейди Хомяков.

«Навбаҳор»ни 1-даврада 3:0 ҳисобида ютганмиз? Ҳа, кейин уларда мураббий ўзгарди. Агар «Навбаҳор»га қарши финалда очиқ ўйин гувоҳи бўлсак, бу «Андижон» учун плюс бўлади. Қарши ҳужумда ўйнашимиз мумкин», - дейди Соҳибжонов.

Маълумот учун, финал 5 октябр куни Фарғонадаги «Истиқлол» стадионида бўлиб ўтади. Баҳс соат 17:00да бошланади.