«Вест Ҳэм» бош мураббийи Хулен Лопетеги Англия лига кубоги доирасида «Ливерпул»дан учралган мағлубият (1:5) ҳақида фикрини билдириб, шогирдлари мавсумдаги энг яхши ўйинларидан бирини ўтказганини айтди.

«Фикримча, биз мавсумдаги энг яхши ўйинларимиздан бирини ўтказдик. Аммо кўпчилик фақат ҳисобга қараса, бундай деб ўйламайди. Бизда жуда кўп имкониятлар бўлганди, аслида бундай ҳисобли мағлубиятга лойиқ эмасдик. Вазиятларни голга айлантира олмадик. Майдонда 10 киши бўлиб қолганимиздан кейин эса ҳолатимиз анча қийинлашди. Лига кубогидан чиқиб кетдик, энди бор эътиборимизни ундан муҳимроқ бўлган турнир – Премьер-лигага қаратамиз», - дейди «Вест Ҳэм» бош мураббийи.