Рафаэл Варан футболдаги фаолиятини якунлади.

31 ёшли ҳимоячи профессионал фаолиятини якунлашга қарор қилди. Бунга францияликнинг сўнгги пайтларда олган жароҳатлари сабаб бўлди. 

«Ланс», «Реал» ва «МЮ» собиқ футболчиси ёзда «Комо»га эркин агент сифатида қўшилганди. У янги жамоаси сафида Италия Кубоги доирасида «Сампдория»га қарши ўйинда (1:1, пеналтилар бўйича — 3:4) дебют қилди, бироқ баҳснинг 23-дақиқасида сонидан олган жароҳати туфайли алмаштирилди. 

Варан «Реал» таркибида 3 мартадан Испания чемпионати, мамлакат Суперкубоги ва Европа Суперкубоги соҳиби бўлган, 4 бор  Чемпионлар Лигаси ва клублар ўртасидаги жаҳон чемпионатида ғолиб чиққан, шунингдек, бир марта Испания кубогини қўлга киритган. «Манчестер Юнайтед» билан эса Англия кубоги ва Лига кубогини ютган. 

Ҳимоячи Франция миллий жамоаси таркибида 2018 йилда жаҳон чемпионати ва 2021 йилда Миллатлар Лигасида зафар қучган.