«Барселона» дарвозабони Марк-Андре тер Стеген тиззасидан олган жароҳати сабабли мавсум якунига қадар сафдан чиқди.

«Барса» дарвозабони «Вилярреал»га қарши учрашувнинг (5:1) 1-бўлимида тўпни чиқиб эгаллаб олиш вақтида ерга ноқулай йиқилиб, шифокорлар ёрдамида майдонни замбилда тарк этганди.

Клуб матбуот хизмати хабарига кўра, германиялик дарвозабон жарроҳлик столига ётади. Тер Стегеннинг ўнг оёқ пайлари тўлиқ шикастланган. Жарроҳлик амалиёти бугун ўтказилади.

Marca хабарига кўра, германиялик дарвозабоннинг қайтиши учун 8 ой вақт талаб этилади. У жорий мавсумнинг қолган қисмини ўтказиб юборади.