Олимпиада бокс баҳсларида ўзбекистонлик яна бир чармқўлқоп устаси яримфинал баҳсида рингга чиқди.

-92 кг вазн тоифасида Лазизбек Мулложонов тожикистонлик Давлат Болтаевга қарши жанг қилди. Яримфинал баҳсининг уч раунд якунларига кўра, ўзбекистонлик боксчи қўшни мамлакат спортчисидан устун келиб иккинчи финалчига айланди.

Шу тариқа, Ҳасанбой Дўсматовдан ташқари, Лазизбек Муллажонов ҳам Олимпиада олтин медал учун курашадиган бўлди. Вакилимиз 9 август куни финалда Озарбойжон вакили Алфонсо Домингесга қарши жанг қилади.

Эслатиб ўтамиз, икки кун аввал Лазизбек Мулложонов чоракфиналда бразилиялик Кено Машадони енгиб, турнирдаги медални кафолатлаганди.

Маълумот учун, бунгача ўзбекистонликлардан Ҳасанбой Дўсматов финалга чиққан бўлса, Абдумалик Халоков, Асадхўжа Мўйдинхўжаев ва Баҳодир Жалолов яримфинал масаласини ижобий ҳал қилишганди.