ФИФА доирасида Марказий Осиёда илк бор ўтказиладиган турнир — FIFA Futsal World Cup 2024 мусобақаси янги ва муҳим босқични қаршилади. Францияда жойлашган ташкилот офисида мундиалнинг кубоги мезбон мамлакат — Ўзбекистонга топширилди. Бу ҳақда ФИФА расмий сайти хабар берди.
Тадбирда ФИФА Президенти Жанни Инфантино, Ўзбекистон Республикаси Спорт вазири Адҳам Икрамов, Осиё Олимпия кенгаши вице-президенти Отабек Умаров, ЎФА биринчи вице-президенти Равшан Эрматов ҳамда МОҚ бош котиби Ойбек Қосимов иштирок этди.
10-бор ташкил этилаётган мундиалда жами 24 та жамоа иштирок этади. Афғонистон, Тожикистон, Янги Зеландия ва Франция турнирда дебют қилса, Португалия чемпионлик унвонини ҳимоя қилишга уринади. Турнир 2024 йилнинг 14 сентябридан 6 октябрига қадар Ўзбекистоннинг уч шаҳрида — Тошкент, Андижон ва Бухорода бўлиб ўтади.
Мусобақанинг қуръа ташлаш маросими 2024 йил 26 майда UNESCO'нинг Жаҳон мероси рўйхатига киритилган Самарқанднинг Регистон майдонида бўлиб ўтди.
«Мен Париждаги офисимизда расмий кубокни Ўзбекистон спорт вазири Адҳам Икромов ва Ўзбекистон футбол ассоциацияси биринчи вице-президенти Равшан Эрматовга топширганимда муҳим бир босқични босиб ўтдик. Ушбу тарихий мусобақага тайёргарлик кўришдаги улкан ишлар учун миннатдорчилик билдирдим ва омад тиладим. Май ойида Самарқандда ўтказилган қуръа ташлаш маросими Ўзбекистондан нималарни кутишимиз мумкинлигини кўрсатиб берди. Мен ушбу мамлакатдан ажойиб ва гўзал турнир мезбонлигини кутмоқдаман», — деди ФИФА Президенти Жанни Инфантино.
Учрашув давомида Ўзбекистон делегацияси ФИФА офисида жойлашган музей билан ҳам танишди. Музейда Равшан Эрматовнинг ҳакамлик давридаги экспонат ҳам намойиш этилди.
«Парижда жойлашган офисимизнинг музейига саёҳат қилиш ва футболнинг буюк тарихини ифодаловчи ёдгорликларни, шу жумладан Равшан Эрматовнинг ҳакамлик давридан қолган экспонатни кўриш жуда ёқимли бўлди», — дея қайд этган ФИФА президенти Жанни Инфантино.