«Атлетико» ва Испания миллий жамоаси форварди Алваро Мората фаолиятини Италияда давом эттиради.

«Милан» клуби испаниялик ҳужумчи билан 2028 йилга қадар шартнома имзолаган. Миланликлар Моратанинг трансфери учун «Атлетико»га 13 миллион евро тўлайди.

Аввалроқ, «Атлетико»ни тарк этган 31 ёшли испаниялик ҳужумчи Мадридда «Милан» учун тиббий кўрикдан ўтгани хабар қилинганди. Футболчининг ўзи ҳам бу борада фикрларини билдирган:

«Фаолиятимдаги энг яхши йиллар мени кутиб турганини сезяпман. Шу боис ушбу буюк клубга ўтишни истадим.

Италияда менга доим юксак ҳурмат билан муносабатда бўлишган. Ёзги таътилни ҳам ўша ерда ўтказмоқчиман. А Серияга қайтишни интизорлик билан кутаман», - деган Мората.

Эслатиб ўтамиз, Мората 2014-2016 ва 2020-22 йилларда Италиянинг бошқа бир клуби «Ювентус» шарафини ҳимоя қилган. Шунингдек, у «Челси» ва «Реал»да ҳам тўп сурган.