Хорватия миллий жамоаси бош мураббийи Златко Далич Евро-2024 3-туридан ўрин олган Италия (1:1) билан ўйинда ҳакам 8 дақиқа қўшиб берганини танқид қилди. 

Беллашувни нидерландиялик Данни Маккели бошқарди. Италия 90+8-дақиқада тўп киритиб, хорватларни плей-оффга чиқиш имкониятидан деярли маҳрум қилди. 

«Албатта, бу натижага таъсир қилди. Қўшиб берилган 8 дақиқани ҳакам қаердан олганини билмайман. Мана 5 йилдан бери УЕФА ва ФИФАнинг хатти-ҳаракатлари ҳақида гапиряпман, лекин ҳеч ким эшитмаяпти, мен эса кулгили кўриняпман. Биз ҳаммамиз улар билан солиштирганда арзимасмиз ва мен айтган ҳамма гаплар шамолда учиб кетади. 

8 дақиқа қўшиб бўлмасди. Бунча вақтни тўплаш учун қанча қоидабузарлик ва тўхталишлар керак?» – деди Далич.