Эдинсон Кавани Уругвай миллий жамоасидаги фаолиятини якунлаганини маълум қилди.

«Менинг қадрдон «селестим». Менга ўргатган ҳамма нарсангиз учун сизга раҳмат айтмоқчиман. Бу ҳақда кўп гапиришни хоҳламайман. Бугун бир неча сўз ёзаман, лекин улар чуқур ҳис-туйғуларга тўла.

Кўп йиллар давомида ушбу саёҳатнинг бир қисми бўлган барчага раҳмат. Мен дунёдаги ҳамма нарсадан кўра кўпроқ севадиган нарса – ватаним рамзи туширилган футболкани кийганимдан хурсанд бўлганман. 

Шубҳасиз, бу бебаҳо йиллар эди. Мен айтадиган, санайдиган ва эслайдиган кўп нарсаларга эга бўлдим, лекин энди ўзимни карерамнинг янги босқичига бағишламоқчиман ва ўзимга боғлиқ бўлган ҳамма нарсани қилмоқчиман.

Бугун жамоани тарк этишга қарор қилдим, лекин майдонга чиқиш навбатим келганида бўлгани каби сизларни ҳар доим бу ёқимли либосда ҳаяжон билан кузатиб бораман», — деб ёзади «Бока Хуниорс»нинг 37 ёшли ҳужумчиси. 

Кавани 2008 йилдан буён Уругвай сафида ўйнаб келарди. 2011 йилда жамоа билан Америка Кубогида ғолиб чиққан. У миллий жамоада жами 136 та ўйин ўтказиб, 58 та гол урган.