«Барселона» клуби раҳбарияти мавсум якунида Хави билан хайрлашишга қарор қилган ва ҳозирда унга ўринбосар қидиришни бошлаган.

As хабарига кўра, Жоан Лапорта клуб спорт директори Декуга кейинги мавсум учун тезроқ янги мураббий топишга буйруқ берган. 

Қайд этилишича, Деку Португалияда бўлиб «Порту» устози Сержиу Консейсау билан учрашган. Шунингдек, Хави ўрнига Ҳанс-Дитер Флик ва «Барса» ёшлари устози Рафаэл Маркес номзоди ҳам бор. Лапорта ушбу 3 номзоддан бири келаси мавсумда жамоани бошқаришини истамоқда.  

Аввалроқ, Хави Каталония клубининг молиявий жиҳатдан «Реал» ва Европанинг етакчи клублари билан рақобатлаша олмаслиги ҳақида гапирганди ва бу Лапорта билан орада совуқчилик пайдо қилган. 

Эслатиб ўтамиз, январ ойида Хави клубни тарк этиши ҳақида эълон қилган бўлса, апрел ойидаги кетма-кет ғалабалардан сўнг Хави фикридан қайтгани ва клуб билан келишув узайтирилиши ҳақида эълон қилганди.