Лига мазкур масала юзасидан «Андижон» футбол клуби, вилоят ҳокимлиги, ички ишлар бошқармаси ҳамда Миллий гвардия бошқармасига мурожаат қилган. Бу ҳақда ПФЛ матбуот хизмати хабар бермоқда.

28 апрел куни Ўзбекистон кубоги доирасида «Андижон» Қаршининг «Насаф» клубини қабул қилиши лозим. Мазкур беллашувга бўлган қизиқишнинг юқори экани Лигани ҳам қувонтиради, ҳам хавотирга солади. Чунки 2024 йилнинг 13 апрел куни «Бобур арена» стадионида ўтказилган «Андижон» — «Динамо» (2:2) учрашувида қатор камчиликлар баёнлаштирилган. Техник зона ортида жойлашган трибунадаги томошабинлар ёрдамчи ҳакамга тинимсиз равишда бетон бўлаклари ва тошлар отгани, учрашув якунланганидан кейин ҳам бу ҳолат давом этиб, кийим алмаштириш хонасига йўл олган ҳакамларга бетон бўлаклари ва тошлар отилгани, футболчиларнинг оила аъзолари учрашув якунида техник зонага қўйиб юборилгани, оқибатда футбол учрашувларини ўтказиш билан боғлиқ қатор нормалар бузилгани учрашув билдиргисида қайд этилган. 

«Учрашувни ташкил этиш билан боғлиқ камчилик масаласида Лига клуб билан ишлайди. «Андижон» фан клуби эса уюшқоқлик, байрам кайфияти ҳосил қилиш ва қатор масалаларда ўзини намоён этаётганидан келиб чиқиб, «Насаф» билан учрашув мухлисларсиз ўтиши масаласи Тартиб-интизом қўмитасига оширилгани йўқ. Бироқ хавфсизлик масаласидан келиб чиқиб, 28 апрель кунги беллашув учун стадионининг 1, 1А, 2, 32-секторлари, шунингдек ВИП трибуна остидаги ўриндиқларни вақтинча ёпиш ҳамда мазкур секторлар учун чипталарни савдога чиқармасликни мақсадга мувофиқ деб топилди. Лига комиссари учрашуволди митинг давомида мазкур масалаларни жамоат тартибини сақлаш учун масъул органлар билан келишиши кўзда тутилган. 

Ўз навбатида Лига андижонлик футбол мухлисларига бевосита мурожаат қилади. «Андижон» халқи меҳмондўст ва бағрикенглиги билан ном таратган. Шунга қарамай, айрим номабқул шахсларнинг хатти-ҳаракати юқоридаги каби ҳолатларга сабаб бўлмоқда. Шундан келиб чиқиб, ён-атрофингиздаги шахсларни бу каби ишлардан қайтариш, уларни тўғри йўлга бошлаш мақсадга мувофиқ ҳисобланади. Зеро, айрим шахсларнигина деб, клуб мухлисларсиз стадион, чипталар савдоси ва бошқа масалаларда азият чекиши ҳам тўғри эмас. Ишонамизки, катта ёшли футбол мухлислари айрим шахслар ўзини ислоҳ қилишида уларга тўғри йўл кўрсата олади. Рақобатбардош клуб, футбол байрами ва ажойиб мухлислар билан вилоят футболи янада яхшироқ марраларни забт эта олишига умид билдирамиз», - дейилади ташкилот хабарида.

Маълумот учун, H гуруҳида «Насаф» ва «Андижон» 1 очко билан 3-4-ўринларда бормоқда.