Криштиану Роналду ўзининг ножўя дея баҳоланаётган ҳаракатини тушунтирди.

Саудия лигасининг 21-турида «Аш-Шабоб»га қарши сафардаги ғалабали ўйиндан (3:2) кейин «Ан-Наср» ҳужумчиси мезбон мухлисларнинг «Месси! Месси!» дея ҳайқиришларига жавобан чап қўлини қулоғига қўйиб, ўнг қўли билан трибуналарга қарата ножўя дея баҳоланаётган ҳаракатни амалга оширди.

Саудия Арабистони футбол федерациясининг дисциплинар ва этика қўмитаси бу эпизодни ўрганишни бошлагач, футболчининг 2 ўйинга дисквалификация қилиниши мумкинлиги ҳақида хабарлар тарқалди.

Бугун Роналду тартиб-интизом қўмитаси олдида чиқиш қилиб, ўз ҳаракатларини изоҳлаган.

«Мен барча клубларни ҳурмат қиламан. Бу кадрлардаги ҳаракат куч ва ғалабани билдиради ва унда ҳеч нарса уятли эмас. Биз Европада бунга одатланганмиз», - дея Роналдунинг сўзларини келтирган Riyaddiah.

Қўмита Криштиану бўйича қандай қарор қабул қилиши ҳозирча номаълум.