Хави «Барселона»нинг чемпионлик учун курашига оптимистик қарамоқда. 

«Чемпионликка имконият? Менимча, бу ҳақда гапиришга ҳали эрта, лекин ҳа. Биз сочиқ ташламаймиз. Сўнгги 5 ўйинда 15 очкодан 13 очко олдик, охиригача ишонишимиз керак.

Ўйлайманки, бизда чемпион бўлиш имконияти бор. «Жирона» ва «Реал»га босим ўтказяпмиз. 

Қилаётган ишимизга ишонамиз. Ўз майдонимизда яна ўзимизга айландик, уйда яхши ўйнай олмаётгандик. Чемпионлар Лигасида эса ҳар қандай натижага эришиш мумкин. 

Истеъфога чиқишни эълон қилганимдан афсусланмайман. Бу — тўғри қарор, чунки жамоа олдинга қадам ташлади. Қароримнинг тўғрилигига аминман — ўзим учун эмас, балки клуб учун.
Мухлисларга эса ёнимда бўлганликлари учун чин қалбимдан миннатдорчилик билдирмоқчиман», — дея каталонияликлар устозининг сўзларини келтиради AS. 

«Барса» Ла Лигада 26та баҳсда 58 очко тўплаб, 2-ўринда бормоқда ва бир ўйини кам «Реал»дан 5 очкога ортда қолмоқда.