Англиялик дарвозабон Жо Ҳарт мавсум охирида профессионал футболдаги фаолиятини якунлайди.

36 ёшли посбон айни дамда «Селтик»да ўйнамоқда. У ўтган мавсумда жамоа билан треблга эришганди. Жо клубга Глазгодаги учинчи мавсуми унинг учун охиргиси бўлишини маълум қилди.

«Футболда эришган ҳамма нарса учун Жо мақтов ва табрикларга лойиқ. У, албатта, «Селтик» учун ҳам, умуман футбол учун ҳам ички ва халқаро миқёсда юқори даражали инсон. 

У бутун фаолияти давомида кўпчилик учун ажойиб жамоадош бўлди. Унинг иш услуби футболдаги барчага ўрнак бўлади.

Ишончим комилки, у мавсум якунигача ҳам худди шундай шиддат, тиришқоқлик ва иштиёқ билан ишлашда давом этади», — дея «Селтик» бош мураббийи Брендан Рожерснинг сўзларини келтиради клуб расмий сайти.

Ҳарт клублар миқёсида 690та ўйинда майдонга тушган. У «Манчестер Сити» (2006-2018), «Тоттенҳэм», «Вест Ҳэм», «Бёрнли», «Бирмингҳэм», «Торино», «Транмер» ва «Шрусбери» клубларида ҳам ўйнаган.

Дарвозабон 2010 йилдан 2016 йилгача 4та йирик турнирда Англия миллий жамоаси таркибида бўлган.