Эртага, 22 феврал куни Осиё Чемпионлар лигаси нимчоракфинал жавоб ўйини доирасида «Навбаҳор» Саудия Арабистонининг «Ал-Иттиҳод» клуби меҳмони бўлади.

Жиддадаги учрашув олдидан Самвел Бабаян матбуот анжуманида иштирок этди.

«Эртанги ўйин жуда қийин кечади. Биз юлдузли таркибга эга бўлган «Ал-Иттиҳод»га қарши  майдонга тушамиз, аммо натижани олдиндан айтиб бўлмайди. Биз учрашувга яхши тайёргарлик кўрдик. Ўйлайманки, шогирдларим бўлажак баҳсда борларини бахшида этишади.

Биз мухлислар қаршисида тўп тепиш тажрибасига эгамиз. Аввалроқ «Ал-Ҳилол» майдонида дуранг ўйнагандик. Эртага «Ал-Иттиҳод» кўпроқ босимга дуч келади, чунки жамоа ўз мухлислари қаршисида тўп тепади.

Эртанги ўйин учун танлаган услубимизни ошкор қилмайман. Бизнинг ёндашувимиз қандай бўлиши ва қандай ўйин намойиш этишимизни бўлажак баҳсда кўрасизлар. Майдонда 11 нафар футболчига 11 нафар  ўйинчи саф тортади. Бензема ажойиб футболчи, лекин биз ҳеч кимдан қўрқмаймиз», - дея Самвел Бабаяннинг сўзларини келтиради клуб матбуот хизмати.

Маълумот учун, Саудиядаги ўйин соат 21:00да бошланади. Дастлабки ўйинда ҳисоб очилмаганди.