ЦСКА ва «Бавария» клуби собиқ ҳужумчиси Ивица Олич Мюнхен клубининг Аббосбек Файзуллаевга қизиқиш билдираётгани ҳақидаги хабарлар бўйича фикрини билдирди.

«Бавария»нинг Файзуллаевга қизиқаётгани ҳақида ҳозирча ҳеч нарса билмайман. Агарда мюнхенликлар уни кузатаётган бўлишса, демак шунинг ўзи футболчининг юқори даражасидан дарак. Аммо Аббосбек буни бир неча мавсумлар давомида исботлаши жуда муҳим. Ўшандагина бу футболчига фақатгина «Бавария» эмас, бошқа грандларнинг ҳам қизиқишини жиддий муҳокама қилсак бўлади. 

Аббосбек яхши жиҳатларга эга ўйинчи экани сезилиб турибди. У Ўзбекистондан келиб, ЦСКАнинг асосий таркибидан тезда жой ола билган футболчи. Фақат юқори савияли ўйин эвазига бунинг имкони бўлади. Файзуллаев шундай давом этса, унга кўплаб клублардан таклифлар жуда кўп бўлишига ишончим комил», - дея хорватиялик собиқ футболчининг сўзларини келтиради Metaratings.ru.

Эслатиб ўтамиз, 20 ёшли яримҳимоячи Ўзбекистон ёшлар жамоаси сафида Осиёда чемпион бўлиб, ЖЧ-2023да иштирок этгач, 2023 йилнинг август ойида «Пахтакор»дан 500 минг евро трансфер пули эвазига ЦСКА клубига кўчиб ўтганди. У ўтган ярим йил ичида Москва жамоасида 4 марта ойнинг энг яхши ўйинчиси деб топилди. У бу орада клубида 18 ўйинда 2 та гол ва 9 та ассистга муаллифлик қилди.

Transfermarkt портали Файзуллаевнинг трансферини 4 миллион еврога баҳолаган.

Аввалроқ, португалиялик футбол агенти Паулу Барбоза Файзуллаев Европа кучли бешлик чемпионатига кўчиб ўтишга тайёрлиги ҳақида гапирганди.