«Динамо» ҳужумчиси Кожо Жоэл фаолиятини Индонезия чемпионатида давом эттириши мумкин.

Kyrgyz Football хабарига кўра, Қирғизистон миллий жамоаси ҳужумчисига Индонезиянинг «ПСИС Семаранг» клуби қизиқиш билдирмоқда. Ушбу клуб Индонезия чемпионатида 4-ўринда бормоқда.

Ўтган мавсум «Динамо» сафида жамоанинг энг яхши ўйинчисига айланган асли ганалик форвард Қирғизистоннинг Осиё кубогида ягона голига муаллифлик қилиб, Уммон дарвозасига киритган голи (1:1) эвазига Индонезиянинг ўз тарихида илк марта плей-офф босқичига чиқишига сабаб бўлганди.

Шундан сўнг, Кожо Индонезияда қаҳрамонга айланиб, унинг инстаграмдаги саҳифасида 250 минг нафарга яқин индонезияликлар обуначи бўлганди.